有日一位先生嚟到診所。
佢登記後就行去坐低，過咗陣佢講住電話咁行埋嚟登記處…
佢：「俾枝筆我呀」
我指指枱面上嘅筆：「呢度有」
佢：「紙呢？」
我俾咗啲我哋平時俾病人寫電話地址嘅紙仔佢。
佢望望：「咁細張？」
你要寫故出書定寫論文呀？返屋企慢慢寫啦。
佢再撩多撩枱面啲筆：「得呢啲？」
我：「係呀」
佢：「垃圾」
垃圾得過你冇筆用。
佢對住電話講：「冇呀，你晏啲再同我講呀，我而家冇筆呀，呢度得啲垃圾拎唔上手呀」
佢突然行去醫生房門前敲門。
我問佢：「先生，請問有咩事呀？有病人喺入面㗎」
佢：「我要筆呀」
滴血寫啦痴線佬。
我：「枱面呢度咪有筆囉？」
佢：「你嗰啲垃圾」
我：「醫生用緊嘅都係呢啲嚟㗎咋」
佢行返去坐低同電話講：「你晏啲再同我講啦，一係我一陣入去再打俾你呀」
佢收線後一直斜眼望我。
入到醫生房後，我聽到佢好大聲講咗句『垃圾喎』。
呃你做咩啫？你以為入到醫生房會見到有名牌墨水筆呀？
我哋啲筆都係藥廠送嘅…幾好寫㗎，試吓呀？
Search